COMENTARIO DO TEXTO 1
DESCARTES: REGRAS PARA A DIRECCIÓN DO ESPÍRITO. REGRA IV
Nesta proposta vai redactada a parte específica de comentario do fragmento, recordade, faltaría a
contextualización (coa que comezamos) e situar ao autor no horizonte da historia da filosofía (co
que rematamos).
O texto pertence a obra Regras para a dirección do espírito , tratado inconcluso escrito en París
no 1628, no que Descartes pretende explicar en detalle en que consiste e cales son as regras do
método.
Neste fragmento defende como proposta filosófica fundamental a necesidade dun método para a
investigación.
Trátase dun texto de epistemoloxía, pois o método Cartesiano é o camiño (ou procedemento) para
acadar a verdade, obxectivo de toda actividade cognoscitiva.
Na filosofía moderna a teoría do coñecemento cobra especial importancia. Se na filosofía antiga e
medieval a reflexión comezaba coa análise do real e secundariamente dirixíase ao coñecemento,
cos modernos comézase por analizar o coñecer e o papel activo do suxeito en dito proceso, pasando
despois a outras disciplinas filosóficas como a metafísica ou a ética.
Os conceptos fundamentais, que quedarán definidos na exposición da cuestión temática son os
seguintes: método, “luz natural” (ou pensamento racional), espírito, coñecemento e verdade ( ou
“luz do día”, expresión que nos trae ao recordo un dos textos máis emblemáticos da filosofía, o mito
da caverna, da República de Platón).
En canto á estrutura argumentativa. Trátase dun texto explicativo no que podemos distinguir
dúas partes. Una primeira, que iría dende o inicio ata “aqueles que botan a súa vida nas escolas”.
Aquí Descartes xustifica a necesidade do método: “Os estudos desordenados e as meditacións
escuras” confunden á razón. En consecuencia, e preciso exercitar a intelixencia e o pensamento
racional e facelo de acordo cun método.
E unha segunda, onde define o método como un conxunto de “regras certas e fáciles”. Finalmente
menciona as súas vantaxes: Evitar o erro, acadar a verdade e aumentar progresivamente o noso
coñecemento, evitando esforzos inútiles.