TEMA 3: COMPOSICIÓN E ESTRUTURA DA MEMBRANA
PLASMÁTICA
3.1. COMPOÑENTES DA MEMBRANA PLASMÁTICA
A estrutura básica da membrana plasmática consiste nunha
bicapa lipídica con proteínas asociadas (e carbohidratos).
Esta estrutura determina unha dobre función: illamento da
célula (a membrana define o límite da célula e determina
a composición do citoplasma) e interacción entre a célula
e seu medio. A maioría das membranas biolóxicas están
formadas polos mesmos compoñentes: lípidos, proteínas e
hidratos de carbono (glícidos).
Dentro dos lípidos que compoñen a membrana
diferéncianse varios tipos:
•Fosfolípidos: esfingolípidos (as súas colas son máis
longas e polo tanto a membrana é máis ancha; teñen
menos de dous enlaces) e fosfoglicéridos.
•Glicolípidos: lípidos que constan de dúas colas de ác.
graxos unidos a unha cabeza polar que contén
carbohidratos. Son os licoglicerolípidos e
glicoesfingolípidos.
•Esterois: fitoesterois e colesterol (normalmente non
están en procariotas).
O carácter anfipático ou anfifílico dos lípidos é o
responsable de que éstes formen espontáneamente
bicapas lipídicas en solución acuosa. Cando as moléculas
anfipáticas se atopan rodeadas por un ambiente acuoso,
tenden a agregarse de tal xeito que as súas partes
hidrofóbicas ou apolares (colas) se esconden no interior e
as súas partes hidrofílicas ou polares (cabeza) quedan
expostas á auga. Dependendo da súa forma, poden
conseguir esta disposición formando micelas esféricas, cas
colas cara ao interior, ou poden formar láminas
bimoleculares ou bicapas, cas colas hidrofóbicas
escondidas entre dúas capas de cabezas hidrofílicas.
Debido á súa forma cilíndrica, a maioría dos fosfolípidos de
membrana forman bicapas en medio acuoso.
